23. april 2002

UA 2002/29

 

A l l a n n g u u t i s s a t u t s i u n n e r s u u t

uunga

 

Atuarfik pillugu inatsisartut peqqussutissaattut siunnersuut.

 

Aappassaanik oqallisigineqarnissaanut Naalakkersuisut saqqummiussaat.

 

§ 1-imut

1. Paragraffi ima oqaasertalerneqassaaq:
"§ 1. Atuarfik tassaavoq kommunip atuarfiutaa, atuartitaasussaatitaanerup atuuttuulernerata kingornagut, tak. § 26, imm. 1 aamma 2, meeqqanut inuusuttunullu ukiuni 10-ni atuartitaanissamik neqeroortussaq, tak. § 3."

 

§ 3-mut

2. Paragraffi ima oqaasertalerneqassaaq:
"§ 3. Atuarfik ukiuni 10-ni atuarfiuvoq, alloriarfinnut pingasunut agguarsimasoq, tassaasut ukiuni 3-ni nukarlerni, ukiuni 4-ni akullerni kiisalu ukiuni 3-ni angajullerni atuarfik, taamaattoq tak. § 26, imm. 1."

 

§ 4-mut

3. Imm. 1-ip kingornatigut immikkoortutut nutaatut ilanngunneqassaaq:
"Imm. 2. Atuartut alloriarfiit akimorlugit klassinut ingiaqatigiinnullu (holdinut) inissinneqarsinnaassapput, atuartut ukiumikkut agguataarnerisa tamanna periarfissaqartippassuk."

Imm. 2 tamatuma kingorna imm. 3-nngussaaq.

 

§ 6-imut

4. Imm. 4-mi "§ 7" allanngussaaq imaalillugu: "§ 7, imm. 1-3".

 

§ 13-imut

5. Imm. 2-mi oqaaseqatigiit siulliit ima oqaasertalissapput:
"Imm. 2. Naalakkersuisut atuartitsissutinut § 9, imm. 1, nr. 1-3-mi aamma atuartitsissutinut qanitariissunut § 9, imm. 1, nr. 4-mi eqqaaneqartunut ilikkagassatut pilersaarutinik, kiisalu atuartitsissutinut qanitariissunut § 9, imm. 1, nr. 5-imi eqqaaneqartunut ilitsersuutaasumik ilikkagassatut pilersaarutinik suliaqassapput."

 

§ 14-imut

6. Imm. 1-imi "piginnaasamikkut kinguarsimanertik" allanngortinneqassaaq imaalillugu: "piginnaasamikkut ajornartorsiuteqarnertik".

7. Imm. 3 ima oqaasertalerneqassaaq:
"Imm. 3. Immikkut atuartitsineq aamma allatut immikkut perorsaanikkut ikiorsiineq malittarisassanik naalakkersuisut aalajangersagaannik tunngaveqarluni aallartisarneqassapput, taamaaliornermi malittarisassat §§-ini 6, 7, 9, 10, 11, 12, 13, imm. 2 aamma 18, imm. 1-6-imi eqqartorneqartut sanioqqutaarneqarsinnaapput."

 

§ 18-imut

8. Imm. 4, oqaaseqatigiit aappaat ima oqaasertalerneqassapput:
"Naliliinermi angajullerni atuarsimanermi ingerlaavartumik nalilerneqartarnerit inerneri ilaatinneqassapput taamatullu atuartitsissutini atuartup peqataaffiini tamani atuartup killiffii ilaatinneqassallutik."

9. Imm. 6 ima oqaasertalerneqassaaq:
"Imm. 6. Atuartunut atuartitaasussaatitaanerup naammassinerani atuarunnaartunut aamma atuartunut § 26, imm. 3 tunngavigalugu klassit 8-aanni atuareernerup kingorna atuartuujunnaarsinnaanermik akuerineqarsimasunut atuarsimanermik uppernarsaammik aamma nalunaarusiortoqassaaq paasissutissiissutigineqarlunilu atuartitaaneq qanoq ittoq atuartup peqataaffigisimaneraa aamma atuartup angajullerni atuartitaanermini ataatsimoortumik pissarsiaasa nalilerneqarnerisa inerneri, kiisalu paasissutissat pisariaqartut allat atuartup naliliinermut tamakkiisumut ilanngukkumasai."

 

§ 24-mut

10. Paragraffimi "§§ 25-27" ima allanngussaaq: "§§ 25-26".

 

§ 42-mut.

11. Imm. 9-mi qallunaatut "og til læreplaner" allanngortinneqassaaq imaalillugu: "og om læreplaner" - kalaallisut allannguuteqanngilaq.

 

§ 46-mut

12. Imm. 2-mi "tak. § 31, imm. 3 aamma § 36, imm. 2" ilanngunneqarluni imaalissaaq:
"Imm. 2. Kommunalbestyrelsip suliassat Naalakkersuisut isumaqatigiissuteqarfigereernerisigut kommunalbestyrelsinut isumagisassanngortitaasimasut, tak. § 31, imm. 3 aamma § 36, imm. 2, pillugit aalajangiinerisa nalunaarutigineqarneranniit sapaatip-akunneri sisamat qaangiutsinnagit Naalakkersuisunut saqqummiunneqarsinnaapput."

 

§ 48-mut

13. Imm. 1-imi "1. august 2002" allanngortinneqassaaq imaalillugu: "1. august 2003" aamma "imm. 2" allanngortissaaq imaalillugu: "imm. 2 aamma 3".

14. Imm. 1-ip kingornatigut imm. 2-tut nutaatut inissinneqassaaq:
"Imm. 2. § 13, imm. 1 aamma 2, § 14, imm. 3, § 15, imm. 2, § 17, imm. 4, oqaaseqatigiit kingulliit, § 18, imm. 1, oqaaseqatigiit kingulliit, § 18, imm. 2, oqaaseqatigiit kingulliit, § 18, imm. 3, oqaaseqatigiit kingulliit, § 18, imm. 4, oqaaseqatigiit kingulliit, § 18, imm. 7, § 20, imm. 5, oqaaseqatigiit kingulliit, § 22, imm. 3, § 25, imm. 2, § 27, imm. 3, § 31, imm. 1, nr. 6, § 31, imm. 2, § 33,imm. 2, § 39, imm. 4, § 40, imm. 1, nr. 1, oqaaseqatigiit kingulliit, § 46, imm. 3, § 47, imm. 6 aamma §§ 48-51 atuuttuulissapput 1. august 2002."

Imm. 2. tamatuma kingorna imm. 3-nngussaaq.

15. Imm. 3-p kingorna imm. 4-tut inissinneqassaaq:
"Imm. 4. Peqqussummi matumani aalajangersakkat aallaavigalugit atuartitsinerup ingerlanneqarneranit misilittakkanik pissarsinissaq siunertaralugu, Inatsisartut peqqussutaanni nr. 1-imi 6. juni 1997-imeersumi malittarisassat 1. august 2002-miit 31.juli 2003-mut sanioqqunneqarnissaat Naalakkersuisut akuersissutigisinnaavaat."

 

§ 49-mut

16. Paragraffi ima oqaasertaqalissaaq:
"Meeqqat atuarfiat pillugu Inatsisartut peqqussutaat nr. 1, 6. juni 1997-imeersoq atorunnaassaaq 1. august 2003, taamaattoq tak. imm. 2-5.
Imm. 2. Meeqqat atuarfiat pillugu Inatsisartut peqqussutaanni nr. 1, 6. juni 1997-imeersumi § 4, 1. juli 2002 atorunnaassaaq.
Imm. 3. Meeqqat atuarfiat pillugu Inatsisartut peqqussutaanni nr. 1, 6. juni 1997-imeersumi § 10, imm. 5 aamma § 11 atuuttuuginnassapput.
Imm. 4. Ukiumi atuarfiusumi 2003/2004-mi atuartunut 7. klassimi qulliunerusuniluunniit aallartittunut Meeqqat atuarfiat pillugu Inatsisartut peqqussutaat nr. 1, 6. juni 1997-imeersoq atuutiinnassaaq, atuartut taakku atuarnerminni naammassinissaasa tungaanut. Naalakkersuisut ikaarsaariarnermi malittarisassanik aalajangersaasinnaapput.
Imm. 5. 1. august 2003-miit 31. juli 2008-mut piffissamut atuartut atuartitaaffissaannut ilaapput nukarlerni ukiuni pingasuni ukiut tamaasa minnerpaamik tiimit 670-it, akullerni piffissamut atuartut atuartitaaffissaannut ilaapput ukiut sisamaanni minnerpaamik tiimit 860-it, ukiut tallimaanni minnerpaamik tiimit 890-it, ukiullu arfernanni arfineq-aappaannilu minnerpaamik tiimit 940-t.
Imm, 6. Malittarisassat Meeqqat atuarfiat pillugu Inatsisartut peqqussutaat nr. 1, 6. juni 1997-imeersoq naapertorlugu atuuttuusut, atuuttuuinnassapput, atorunnaarsinneqarnissamik imaluunniit malittarisassanik inatsisartut peqqussutaat manna inatsisilluunniit allat naapertorlugit aalajangersakkanik allanik taarserneqarnissamik tungaannut. Namminersornerullutik Oqartussat meeqqat atuarfianni sunngiffimmi sammisassaqartitsisarneq pillugu nalunaarutaat nr. 14, 29. maj 1995-imeersoq 1. juli 2002 atorunnaassaaq."

 

Oqaaseqaatit

Allannguutissatut siunnersuut saqqummiunneqarpoq siunnersuutaaqqaartumut naleqqiullugu pingaarutilitsigut allannguisoqarmat.

Allannguutit ilaatigut aallaaveqarput inassuteqaataasunit soorlu Ilinniartitaanermut Ministeeriaqarfimmit, IMAK-kimit KANUKOKA-millu, ilaatigullu siullermeerluni oqallisaareernerata kingorna misissoqqissaarneqarneranit.

Atuuttuulernissaata kinguartinnerata, tak. allannguut nr. 13, nassatarissavaa, siunnersuummi ilinniartitsisut tiimiinut atuinermut piffissami ikaarsaariarfimmi aningaasartuutaanerusussatut missingersersuutit aatsaat 2003-miit atuutilernissaat, imaappoq ukiumik ataatsimik kingusinnerusukkut.

Meeqqat atuarfianni atuartunut angajullernut tapiissuteqartarneq pillugu Inatsisartut peqqussutaata nr. 5, 28. oktober 1982-imeersup attatiinnarneqarnerata nassatarissavaa, 2008-miit - peqqussutip tamakkiisumik atuutilerneraniit - ukiumut sipaarutissatut missingersersuutit 7-8 mio. kr.-unatik 2-2½ mio. kr.-unissaat ilimagisariaqarmat. Sipaarutissaqartuarnissaanut pissutaavoq 11. aamma 12. klassit peqqussutip akuerineqarneraniit atuuttuujunnaassammata.

Allannguutit allat ingerlatsinikkut aningaasaqarnikkulluunniit sunniuteqassanngillat.

 

Nr. 1-imut

Allannguutissatut siunnersuut saqqummiunneqarpoq, nalilerneqarmat siunnersuummi siullermeertumik oqallisigineqartumi aalajangersagaasut oqaasertaasa nassatarissagaat, atuarfiup taamaallaat meeqqat inuusuttullu atuartitaasussaatitaasut atuartinneqarnissaannik neqeroorfigisussaassagai, imaappoq 9. klasse ilanngullugu atuartut kisiisa. Tamannalu siunertaanngilaq.

Nr. 2-mut

Siullermeertumik oqallisaasumut sanilliullugu Ilinniartitaanermut Ministeeriaqarfiup qinnuteqaataa naapertorlugu siunnersuutip § 26, imm. 1-ianut innersuussut ilanngunneqarpoq. Tamatumani siunertaavoq, atuarneq ukiunik 10-nik sivisussuseqaraluartoq, ukiut atuartitaasussaatitaaffiit suli 9-unerisa erseqqissarnissaat.

Nr. 3-mut

Allannguutissatut siunnersuutip siunertaraa atuartut klassit akimorlugit atuartitaasarnerisa maannamut atuuttup ingerlateqqinneqarsinnaanissaa - atuartut ukiumikkut agguataarnerisa tamanna periarfissaqartippassuk. Tassunga atatillugu Meeqqat atuarfiat pillugu Inatsisartut peqqussutaanni nr. 1, 6. juni 1997-imeersumi § 40 innersuunneqarsinnaavoq.

Oqaasertaliussat uku: "atuartut ukiumikkut agguataarnerisa tamanna periarfissaqartippassuk" ima paasineqassapput: klassini ukioqatigiiaani atuartut ikittuinnaagaangata. Taama pisoqartillugu perorsaanermut aamma ilinniartitsisunik atorluaanissamut tunngasutigut alloriarfiit akimorlugit atuartut atuartinneqarsinnaanissaat siunertamut naapertuuttuussaaq.

Nr. 4-mut

Allannguutissatut siunnersuut saqqummiunneqarpoq § 27, imm. 4 tassatuaammat piginnaatitsilluni aalajangersagaq, taamaammallu § 6, imm. 4-mi tassunga innersuussinissaq eqqortuunani.

Nr. 5-imut

Siunnersuummut siullermeerutaasumik oqallisigineqartumi aalajangersakkat oqaasertalernerannut naleqqiullugu ilanngunneqarput: "kiisalu atuartitsissutinut qanitariissunut § 9, imm. 1, nr. 5-imi eqqaaneqartunut ilitsersuutaasumik ilikkagassatut pilersaarutinik suliaqassapput." Allannguutissatut siunnersuut saqqummiunneqarpoq, alloriarfinni anguniagassat, atuartitsissutini anguniagassat ilikkagassatullu anguniagassat pillugit nalunaarutissatut siunnersuutip tusarniaassutigineqarneranut atatillugu, IMAK-ip atuartitsissutissat qanitariissut Sumiiffinni ataasiakkaani toqqagassat, qitiusumiit ilikkagassatut pilersaarutinik sanaanneqanngippata pingaaruteqannginnerusutut isigineqalernissaat ernummatigimmagu. Allannguutissatut siunnersuutikkut Naalakkersuisut pisussaaffilerneqarput ilitsersuutaasumik ilikkagassatut pilersaarusiornissaminnut. Sumiiffinni ataasiakkaani toqqagassat pinngitsoorani malitassanik ilikkagassatut pilersaarusiorneqarnissaat, atuartitsinerup eqaatsumik pilersaarusiorsinnaanissaanik isummanut akerliusutut isigineqarpoq.

 
Nr. 6-imut

Allannguutissatut siunnersuut saqqummiunneqarpoq, atuarfimmi immikkut atuartitsineq allatigullu perorsaanikkut immikkut ikiorsiisarneq pillugu nalunaarutissatut siunnersuutip tusarniaassutigineqarneranut atatillugu tamanna siunnersuutigineqarmat.

Oqariaaseq "piginnaasamikkut kinguarsimanertik" uninngaannarpallaartutut isigineqarpoq, atortutigut kukkuneqarnera amigaateqartoqarneralu takorlooqqajaanarsinnaalluni. Taamaaliornikkut oqaatigineqanngilaq meeqqap ajornartorsiutai aamma tassaasinnaasut avatangiiserisallu inooqatigiinnermut tunngasut. Taamaammat isumaqartoqarpoq "piginnaasamikkut ajornartorsiuteqarnertik" eqqortuunerusoq.

Nr. 7-imut

Allannguutissatut siunnersuut saqqummiunneqarpoq, immikkut atuartitsineq pillugu malittarisassani naliliisarnermik aalajangersakkat sanioqqunneqarnissaannut periarfissaqarnissap aammattaaq kissaatigineqarnerata kingunerisaanik. Malittarisassat atuuttut naapertorlugit atuartunut - atuartitsissummi ataatsimi arlalinniluunniit - immikkut atuartitaasunut killiffimmik naliliinernut karakteerinullu taarsiullugu atuarfik allakkatigut oqaaseqaasiorsinnaavoq. Meeqqat atuarfianni naliliisarneq il.il. pillugit Namminersornerullutik Oqartussat nalunaarutaanni nr. 24-mi, 6. juni 1994-imeersumi § 14 innersuunneqarpoq. Taamaalilluni taassuma ingerlatiinnarneqarnissaa kissaatigineqarsimavoq.

Nr. 8-mut

Siunnersuummi siullermeerutaasumik oqallisigineqareersumi oqaasertaliussanut sanilliullugu, qallunaatuaani oqaaseq "evalueringen" - naliliineq - "vurderingen"-imik (naliliineq/"qimerluuineq")) taarserneqarpoq. Tamatumunnga pissutaavoq imm. 4-mi oqaaseqatigiinni siullerni oqaaseq "vurderingen" atorneqarmat, tamannalu oqaaseqatigiit aappaanni nassuiarneqarmat.

Nr. 9-mut

Allannguutissatut siunnersuummi aalajangersakkamut ilanngunneqarput atuartut atuartitaasussaatitaanermik kingorna - imaappoq 9. klassip kingorna - atuarnerminnik naammassisut.

Siunniussaanikuunngilaq atuartunut taakkununnga atuarunnaarnermi uppernarsaasiortoqartannginnissaa. Allannguutissatut siunnersuutikkut maanna inatsisitigut pisinnaatitaaffik attatiinnarneqassaaq, tamatumalu kingorna atuartunut 9. klassimiit atuarunnaartunut atuarunnaarnermi uppernarsaammik sanasoqartassalluni.

Nr. 10-mut

Allannguummut tunuliaqutaavoq § 27-mi atuartitaasussaatitaaneq pineqanngimmat, taamaammallu § 24-mi § 27-p innersuunnissaa eqqortuunani.

Nr. 11-mut

Allannguutissatut siunnersuutikkut erseqqissarneqarpoq pineqartut tassaammata sumiiffinni ataasiakkaani toqqagassat § 9, imm. 1, nr. 5-imi eqqaaneqartut ilikkagassatut pilersaarutaat. Taamaalilluni pineqanngillat ilikkagassatut siunnersuutinut ilassutissat - siunnersuummi siullermeerutaasumik oqallisigineqartumi aalajangersakkani eqqartorneqaraluartut.

Nr. 12-mut

§ 31, imm. 3-mut aamma § 36, imm. 2-mut innersuussilluni ilassutit siunnersuutigineqarput erseqqissarumallugu aalajangiinerit suut pineqarnersut.

Nr. 13-imut

Ulloq peqqussutip atuuttuulerfissaa IMAK-ip KANUKOKA-llu inassuteqarnerisigut siunnersuutigineqarpoq 1. august 2002-miit 1. august 2003-mut kinguartinneqassasoq. Kinguartitsinissamik siunnersuutip siunertaraa piffissaq ilinniartitsisut suliffissaat pillugu isumaqatigiissutissap nutaap isumaqatigiissutiginiarnissaanut pitsaanerusumik piffissaliinissaq. Kinguartitsinerup aammattaaq atuarfiit ataasiakkaat peqqussutip nutaap atuutilernissaanut piareersarluarnerunissamut periarfississavai. Nr. 14-imut oqaaseqaatini eqqaaneqartutut, siunnersuutigineqarpoq peqqussummi malittarisassat ilaat 1. august 2002-miit atuuttuulissasut. "Imm. 2"-p "imm. 2 aamma 3"-nngorlugu allanngornissaa siunnersuutaavoq, § 48-mi nutaamik imm. 2-qalernisaanik siunnersuutip kingunerisaanik, tamatumalu kingunerisaanik maannamut imm. 2-jusimasoq imm. 3-nngussalluni, tak. allannguut nr. 14.

Nr. 14-imut

Allannguutissatut siunnersuutip ilaatigut siunerataraa naalakkersuisut peqqussutip atuutilinnginnerani pisariaqartutigut ingerlatsinikkut malittarisassaliornissamut pisinnaatitaalernissaat.

Tamatuma saniatigut siunnersuutip siunertaraa qularnaassallugu, Naalakkersuisut 1. august 2002-miilli perorsaanikkut ilisimatusarnermik inerisaanermillu kiisalu atuarfiup ingerlatsineranik naliliisarnermik ingerlatsilereernissaat aammalu suliassat taakku suliarinissaannut perorsaanikkut ilisimatusarfimmik, naliliisarfimmik ilinniarfimmillu pilersitsinissaat, tak. § 31, imm. 1, nr. 6 aamma § 31, imm. 2.

Kiisalu siunnersuutip siunertaraa ikaarsaariarnermi aalajangersakkat 1. august 2002-miit atuuttuulernissaasa qularnaarnissaat.

Nr. 15-imut

Allannguutissatut siunnersuutip siunertaraa, atuarfiit peqqussummi matumani atuartitsineq pillugu aalajangersakkat naapertorlugit atuartitsinissaminnut piareersorisut 1. august 2003-mi atuuttuulersitsinissaq sioqqullugu aallartinnissaannut periarfissinneqarnissaat. Taamaaliorneq atuuttuulersitsineq sioqqullugu atuarfinnut naalakkersuisunullu misilittagaqarlualernermik nassataqassaaq.

Nr. 16-imut

Paragraffimi immikkoortut allanngorneqarput. Aammattaaq imm. 2 nutaaq inissinneqarpoq, tamatumalu kingunerisaanik maannamut imm. 2-5 imm. 3-6-inngorlutik.

Imm. 1-imut

Allannguutissatut siunnersuutip nassatarissavaa, Meeqqat atuarfianni atuartut angajulliit tapiiffigineqartarnerat pillugu peqqussutip nr. 5, 28. oktober 1982-imeersup atuuttuujunnaarsinneqannginnissaa.

Peqqussutissatut siunnersuutip nalinginnaasumik oqaaseqaatitaani allassimavoq, KANUKOKA suleqatigalugu misissuisoqartoq, ilaqutariit qassit aaqqissuussinerup atuuttuujunnaarsinneranik sunnerneqarumaarnerat paasiniarlugu, tamatumunnga ilaalluni ilaqutariit pineqartut isertitaasa immikkut erseqqissaaviginerat - illoqarfinnut nunaqarfinnullu immikkoortillugit. Ilaatigut misissuinerup inerneri tunuliaqutaralugit, KANUKOKA-llu inassuteqarnerata kingorna, Naalakkersuisut aalajangiuppaat siunnersuutiginiarlugu aaqqissuussineq maannakkut atorunnaarsinneqassanngitsoq.

Ilutigalugu allannguutissatut siunnersuut ullup atuuttulerfissap kinguartinnissaanik siunnersuutip malitsigisaanik naqqiuteqarnermut ersiutaavoq, tak. allannguut nr. 13.

Imm. 2-mut

Allannguutissatut siunnersuummi siunnersuutigineqarpoq Meeqqat atuarfiat pillugu Inatsisartut peqqussutaanni nr. 1, 6. juni 1997-imeersumi § 4 1. juli 2002-miilli atorunnaarsinneqassasoq, tassami Kultureqarneq sunngiffimmilu sammisassaqartitsiniarneq pillugu inatsisartut peqqussutissaattut siunnersuummi, inatsisartut ataatsimiinneranni matumani aammattaaq oqallisigineqartussami (oqaluuserisassaq nr. 24) siunnersuutaavoq peqqussut taanna 1. juli 2002-miit atuuttuulissasoq. Aammattaaq imm. 3 pillugu oqaaseqaatit innersuunneqarput.

Imm. 3-mut

Siunnersuummut siullermeerutaasumik oqallisigineqareersumut sanilliullugu allannguutaavoq Meeqqat atuarfiat pillugu Inatsisartut peqqussutaanni nr. 1-imi, 6. juni 1997-imeersumi § 4 attatiinnarneqartussatut siunnersuutaajunnaarmat. Tamatumunnga pissutaavoq kultureqarneq sunngiffimmilu sammisassaqatitsiniarneq pillugu inatsisartut peqqussutissaattut siunnersuut akuersissutigineqassammat atuuttuulerlunilu suli atuarfik pillugu peqqussut nutaaq atuuttuulinngitsoq, aammattaaq tak. imm. 2 pillugu oqaaseqaatit.

Imm. 4-mut

"Ukioq atuarfiusoq 2002/2003" "ukioq atuarfiusoq 2003/2004"-nngorlugu naqqinneqarnerata saniatigut, aalajangersakkap siunnersuummi siullermeerutaasumik oqallisigineqareersumi § 49, imm. 3 assigaa. Ullup atuuttulerfissap kinguartinnissaanik siunnersuutip malitsigisaanik naqqiuteqarnermut ersiutaavoq, tak. allannguut nr. 13.

Imm. 5-imut

"1. august 2002-miit 31. juli 2007-imut" "1. august 2002-miit 31. juli 2008-mut"-nngorlugu allannguinerup saniatigut aalajangersakkap siunnersuummi siullermeerlugu oqallisaareersumi § 49, imm. 4 assigaa. Ullup atuuttulerfissap kinguartinnissaanik siunnersuutip malitsigisaanik naqqiuteqarnermut ersiutaavoq, tak. allannguut nr. 13.

Imm. 6-imut

Siunnersuummi siullermeertumik oqallisaareersumi § 49, imm. 5 allannguutissatut siunnersuummi matumani attatiinnarneqarpoq. Nutaatut ilanngunneqarput oqaaseqatigiit aappaat, tassuunakkut Meeqqat atuarfianni sunngiffimmi sammisassaqartitsiniarneq pillugu Namminersornerullutik Oqartussat nalunaarutat nr. 14, 29. maj 1995-imeersoq 1. juli 2002 atuuttuujunnaarsinneqassalluni. Tamanna Meeqqat atuarfiat pillugu Inatsisartut peqqussutaanni nr. 1-imi, 6. juni 1997-imeersumi § 4-p atuuttuujunnaarsinneqartussatut siunnersuutigineqarnerata nassatarivaa, tak. imm. 2. Tamatuma tunuliaqutaanut tunngatillugu imm. 2-mut aamma 3-mut oqaaseqaatit innersuunneqarput.